රෝස පෙති මල්වරව....

පළාවන් පවුරු අහස උසටම
සිරවී හිඳිත් ලපටි රෝස පෙති
බඹරු දැක නැත මෙතරම් රෝස පැහැ
නොහඳුනයි පිනි බින්ඳු නුඹේ මුදු පහස....
කොරොස් ක‍ටු පිරී නැත
ලපටි න‍ටු අග්ගිස්සෙ
පෙති තැලී පොඩිවෙලා
නැත බඹරු රොන් උරා.....
පවුර අසලටම වී තනිව
රොන් පිරී සුවඳ දෙන
මුහුකුරා වූ කුසුම්
ගැන සිතා ලත නොවන්
බඹර පහසම ලබන
නේක මල් පොකුරු දැක
මංමුළා නොම වෙයන්
රතු රෝස පැහැය දැක....
හෙට උදෑසන නැගෙන
පළමු හිරු ‍රැස් පැමිණ
අඬගසා හිඳී
පිබිදෙන්න පෙති විකසිතව
පළාවන් පවුරු බිඳ
විහිදුවා මුදු සුවඳ
මුකුරා මල්වරව
නොපිපියන් ලොවට නුඹ....