Tuesday, August 28, 2012

පුර හඳ කළුවර....

ඉදිකඩ පසුකර ගොම්මන් කළුවර
ගෙට ගොඩවෙනවා පෑල දොරින්
ගෙපැලේ කෙලවර ඉනිවැට අයිනේ
අම්මේ නුඹ තාමත් තනියෙන්....

කුප්පි ලාම්පුව දිලුනත් ගේ මැද
සඳකැන් වැ‍ටුනත් වහලෙන් ගෙබිමට
ඔහු නැති ගේ ඇති පුර හඳ කළුවර
මකා දමනු බෑ ආවත් පුර සඳ....

පාළු ගොයම ඉකි බිඳිමින් හැඬුවට
රෑ දාවල් නුඹ දෑස රිදෙව්වට
ලනු ඇඳ උඩ හිඳ අප සනසන්නට
එන්නේ කළුවර විතරයි හවසට....

Wednesday, August 22, 2012

අසම්මතය....

අමාවක සළුපටින් වැසුනු ඒ සඳ මඬල
මෝදු වී පැමිනේද සිකුරු දින අහස් කුස
අඳුරු වු සළු  පටේ තරු පොකුරු රටාවට
පරයන්න බෑ නුඹේ දිගු නීල නෙත් කැල්ම....

සඳේ රුව විඳි නමුත් සඳට ලංවනු කෙසේ
සිතිජ ඉම බෝ දුරයි නිමක් නම් නොව පෙනේ
සම්මතය ජීවිතය  එක්ව යන මවතේ
සිතනු බෑ සොඳුරියේ අසම්මත ආදරේ....

Friday, August 17, 2012

පෙම් බඳිමි සැමදා ලොව හැර ගියත් පෙරදා....


අවදියෙන් නුඹ අවදියෙන්
අඳුරු රෑ නුඹ අවදියෙන්
සදාකාලික නින්ද  හිමි නුඹ
අවදියෙන් අවදියෙන්....

පුරා පෝදා සඳක එලියට
නොදු‍ටු නුඹෙ හැඩ බලමි අඳුරෙම
වෙනදාට නැති නිසල නෙත් යුග
සඟවා ඇත රෑ අහස් කුස තුල....

වැටෙන වැහි පොද රුදුරු සිතල
වෙලා ගත මුත් නුඹේ මුදු වත
විශාකාවක් ලෙසින් තනිවම
කුමරි බඹසර රකිනවද නුඹ....

සඳ පහන් වු ‍රැයට වැඩියෙන්
අඳුරු සීතල මොහොත මනරම්
අඳුරු ‍රැයකදි බැන්ද පෙමකට
මග බලමි නුඹ හෙටත් එනකන්....

Wednesday, August 15, 2012

හිරුට හිමි වී සඳුට පෙම් බැඳ....

ඉකි බිඳින්නට අඳුර එනකන්
මග බලන සි‍ටු කුමරියක වී
තෙමුණු දෑසින් වැටෙන කඳුලින්
 නිවාලන්නද හදක ගිනිදැල්....   

හිරුට හිමි වී සඳුට පෙම් බැඳ
හිරුට හිනහෙන සඳවතිය නුඹ
පතයි අඳුරම සඳක සැනසුම
ලද නමුත් හිරු ‍රැසක උණුසුම....

බිය සැකය කරලියක පි‍ටුපස
චපල චන්චල හදක් රඟදෙන
උන්මතෙකුගේ සුදු කෙලියක
රඟයි ඈ හසඟනක් වී හිඳ....

Tuesday, August 7, 2012

දෙවියන් ඔබමයි මගේ අම්මේ....

පෙරලද ජන්මයේ කරලද පිනකට
මාහට මව් සෙනෙහේ ලැබුනා
දෙවියනි නුඹ හට වැඩියෙන් මා හට
මා මව් ‍රැකවරනය දුන්නා....

දසමස කුස තුළ මා ‍රැකගත් නුඹ
රතු ලේ කිරිකර මට පෙව්වා
ඔබ දුන් ශක්තිය ඔබ දුන් ජීවය
මාගේ දිවිමග පණ පෙව්වා....

ඔවදන් දී මා නිසිමග යැව් ඔබ
මා දිවියේ මුර දෙවියන් වු ඔබ
පතනා භවයක පතනා මොහොතක
තුන්ලොව සනසන බුදු වේවා....

Thursday, August 2, 2012

අපේ එකා....

ගෙවිනි තෙවසරක්
පසු කළෙමු බෝ දුරක්
බැඳුණු මිතු දමක්
සහෝදර ප්‍රේමයක්....

හා... මචන් කොහොමද
බොග දානවද උඹ
අතට පොත ගත් කල
අසයි අපි සැම දෙන....

බැජ් එකේ එක වැඩක්
වුස් වල පෝස්ටරයක්
ඕනෙම දානයක්
නැත උගේ මීටරයක්....

මොහොතකදි උඹ ගියා
අප දමා සැඟවුනා
සහෝදර මිතු දමක්
මතකයට මුසු උනා....

Wednesday, August 1, 2012

සබඳ එක්ව යමු සැමදා

සිනිඳු පාවඩ නැත එලන්න
රුවැති මල් දම් නැත දමන්නට
එක්ව යන්නට ‍රැගෙන යන්නට ‍රැගෙන නුඹෙ අත
ලැබුනු සැඩ රලු මාවතකි මෙය.....

හන්තාන කඳු වසා පැතිරෙන
සිනිඳු මීදුම් සේලයක් ගෙන
රුදුරු වන පති හිසෙහි පලඳින
සුපිපි මල් දම් එකට කැටිකොට
සරසවමු අපි නුඹේ මාවත
නොලබනා රළු පහස නුඹ හට.....

කෙලක් රෝදුක් උසුලවාගෙන
ගැහැට විඳිනා ලෝ සතුන් වෙත
උතුම් ජීවක වෙද වරුන් ලෙස
ගනිමු නුඹෙ අත එක්ව යනු ලෙස.....